SO LUAN TI – I

Posted on Posted in Calai, Nunthuleng

#by Mai Sokhlei Par

(1)

Singapore ih hnenum tuan a harnak hmuahhmuah pheh tahratin nuam zet bangih rak relaw a rualpipawl a vun mitthlam tinte’n a parah duhsaknak an nei lo tuk tiah Tialte cu a thin a hengsal ringring theu.

Unau sarih lakih upabik Tialte cu phun hra a awn vete’n phunsangtlawng cawl sungih sum hlawhawk ding lawnglawng a sal. A naule paruk tlawngkai vivo lai dingpawl a vun ruah tinte’n a nulepai’ lo hnatuannak lawng ihsi cun a ngaihnak a um lo ti a thei. An khua ‘Rinim Buk’ ihsin Singapore ah hnenum tuanih hlawhaw a rualpipawl thuhla a vun sut cu a phur sinsin. Cuti’n a nulepa’n mitthli thawn an rak thlah liam kha a si.

Singapore a feh hlan, Yangon a um laiah tawnsuhnak (interview) hrangah tindan a rak kai ta. Cui’sin Singapore ah tawnsuhnak tuah a si ih, cumi ih a awngtupawl lawng Singapore ram ah ‘Maid’ (hnenum) an tuan thei. Tawnsuhnak ah cun elektrawnik thilripawl a hmandan, insang hnatuandan le rawlsuandan tivek pawl suh a si. Cule Mirang tawng thiam le thiam lo khal an zohfel thotho. Hi tawnsuhnak ih sungpawl cu Kawlram ah kuatkir an si ih, tindan an kaisal lala theu. Singapore ah vawi thum tiang tawnsuhnak sungtu khal an tampi.

Cumi lakah Tialte cu a vawikhatnak in a awng vurvo ih a lungawi tuk. Mai hnatuannak ding inn thlen hlan, Yangon ihsin Singapore an ra thlen vete’n Singapore Agent-nui’ retnak ah um a si ih, rawl tla khawpkhamin an ei dah lo.

An zate’n mi 40 lai an si ih, Tialte vek Kawlram ihsi ra an um vekin Philippines, Bangladesh, India, Indonesia le Tuluk ram ihsi ra khal an tampi ve. Himi lakah Indonesia, Vietnam le Bangladesh ram ihsi ra thleng pawl cu an ram ah ngakaimi le lothlomi an si ruangah a si ding, an thazang a khohkhah ih an cak ngaingai. Asinan, fimzirnak lamah cun Suakthuan Tlawng (High School) thleng ban hman an um mumal lo.

Tialte cu mizirawpawl a si ruangah Mirang tawng siseh, thiltidan khal siseh a thiam zutzo mai. Agent hnenih zarh hnih hrawng a um hnuah hnatuan a ngah cih.

Singapore ih a umnakte cu fate pakhat nei nupa an si. An pa cu kampani hnatuan a si ih, a nupi cu awnlai cazirhtu a si. Curuangah inteknu cu inn ah a um deuh ringring. Anih cun Tialte cu inn sung luhnak sangka zawnah sawfa fate phahin a itter. A tai ihsin tanglam cu tapthlang ah, a tlunlam cu sawfa ah, cuti’n a it theu. Cule inteknui’ mithmuh ah thil zianghman a ei ngam dah lo; a ei lai a hmu asile boss hmaiih thil ei dan a si lo ti’n a ti. Curuangah zawi hmuh lo dingin a ei thup theu. Rawlngai ei can an pek lo ruangah Tialte cu pawnghmuk kawh phahphahin hna a tuan a tul.

A rawl suan ding thu-ah inteknui’ fialmi lo bak zianghman a tuah bet dah lo; a fial vek cekci’n a tuan, a tuah, a suang a si ko. Cun, zialrawtnak fung thawi zialrawt tla a siang lo ih, kut thawn a rawtter. A rawt theh ah inteknu’n kawm le ker hmuahhmuah a zohfel thluh – a mehtawk thawn a vun thai ih bal a kai asile Tialte a ra hmuh ih a biang ah a tat ciamco. Asinan, inteknui’ hmaiah a tap ngam dah lo. A ningnatzia khal a mithmai ah a langter ngam hrimhrim lo.

Sangka thlalang a hnawt khalle inteknu’n a ra zohfelsal ringring. Tintihrik tiate a bal a hmu asile Tialte ih hna a hmuaisak cih; a hmuainak zawn hman a hna hnuailam ah si loin a hna tlunlam ruh note rori khi a hmuai theu ih Tialte cu na a ti tuknak ah a mitthli a hal kiangkiang theu. Khua ih a um laiah khan hnatuan khunghar ding lawng a rak ruat ih, hivekin hrem tuar tla a tul ding ti hi cu a rak ruat ban dah lo lawlaw. Zohman khalin an rak sim dah lo.

Hi inn a ra thlen pek ihsin inteknu in zohman fawn biak sian a si lo ding thu a rak cah cia. Cun cawlh (off-day) pek a si lo ih, inn leng khal a suak dah lo lawlaw. Curuangah Tialte cun biakinn siseh, pawlkawm siseh, rualpi le sungtepawl siseh, zohman a be thei lo, a tel thei lo. Zing nahzi panga le khuai ihsin zan hleikhat tiang cawl lo riaiih hnatuan a si ih, a cancan ah cun thu dangdang ruat man khal a si lo. Cucu a hrangah a thasawn ti’n a ruat riangri. Culoih thu a ruat man tuk asile a thinlung a buai theh ding ti a thei!

Peh lai ding……

Leave a Reply

Your email address will not be published. Required fields are marked *