VAPUAL TLANGAU LE REV. DR. LALDUHAWMA INTERVIEW

Posted on Posted in Calai, Interview, Media

2014 December thla khat sung FCFS kilkhawitu Saya Rev. Dr. Lalduhawma cu Vapual Tlangau in a tanglam vekin kawmnak a nei. Thusuhnak tuahtu hi VT zohfel bawmtu Mai Daidim a si.

VT : Na thuanthu tawi, Na hmin, nu le pa hmin, suahnak khua, na insang, tuih umnak le na thuken tipawl? Ṭṭ
LDA : Ka hmin cu Lalduhdawma ka siih Rihkhawdar khua (Falam pengih tili mawibik kan neihnak) ah ka suak. Cun, Rihkhawdar Khua ihsin phun hnih ka zir ṭheh hnu’n Falam ah kan rak ṭhawn. 1971 kum ihsin tuini tiang Falam ah kan um. Ka pa hi Pu Kam Lo a siih ka nu cu Pi Zar Kap Thang a si. Unau suahpi 8 ka nei ih mipa 5, nunau 3 kan si. Cun, ka insangnu hi Rosiami a siih Falam suak a si ve. Pathian zarah fanu 3 le fapa 1 kan nei. Tuini ah Pathian thlawsuahnak co in tupa 3, kan fapa ih fapa 1, kan fanu ih fanu pahnih kan nei.

VT : Leitlun fimthiam zirnak lamah ziangtiang na zir? Bible lam in teh ziangmi na theh ti pawl theih kan duh?
LDA : Primary tlawng phun hnih tiang Rihkhawdar ah ka rak kai. Phun thum ihsin Falam ah ka kai. Falam Bualrawn tlawngah phun thum ka rak kai ih Kawl tlawng ah phun li, phun nga ihsin phun hra tiang Canbary ah ka kai. Phun hra hi olten ka rak ong lo. Phun hra kum 3 ka kai ih cun nupi ka ṭhit. Cun Pathian lamah hna ka ṭuan, zungah cazi kum li ka ṭuan hnu ah Pastor training ka kai. Cuhnu ah phun hra ka phi sal. Bible tlawng hi hmun nga ah ka kai. Hmaisabik ka kainak cu Mandalay TI an ti kannih kan kai lai ahcun, tu ahcun Myanmar Theological College an ti. Methodist Bible tlawngah ka rak kai. Diploma kan lak theinak hi kum 3 a si. Cumi ṭheh ah ZTC ah B.Th ka kai, kum li an zir mi kha kum 2 ih ṭheh dingin in zirter ih napin ka rak zuam. Cumi ṭheh ah Yangon ah ka suksal ih AECS an tiih (Asia Evangelical College & Seminary) an timi ah M.Min ka va tuah ih cutawk tlawng cu ka luh tumnak ngaingai si lo ruangah India ram SAIACS an timi “South Asia Institute of Advanced Christian Studies” ah MA ka va tuahsal ih kum 2 ah Pathian zarah tluangten ka va ṭhehsal. Cun, Kawlram ka rak tlungsal ih rongbawlnak kum 8, 9 lai ka neisal hnu ah Pathian hnenih ka thlacamnak kum 6, 7 hnu ah a phi in peksal ih Philipine ah June 1, 2011 kha ka va thleng. Cuticun Union Theological Seminary ah D.Min kan timi Doctor of Ministry kha kum 2 le hrek sung ih ṭheh ding an timi kum 1 le hrek ah ka va ṭheh thei ih ka lungawi Pathian ka thangṭhat.

VT : Singapore um Chinmipawl ih nuntukhawsakdan ziangtin na hmu?
LDA : Falam ihsin ka rat hlanah hitawk pawlkom hotupawlin thawm in rak than ih member 500 lai kan siih mi 200 hrawng zarhpi tin kan khawm thei ṭheu an ti tikah ka lungawi zet. Ziangruangahtile Laimi cu Pathian duhtu kan si member 500 sungih 200 khawm thei tihi a ṭha zetin ka thei. Kannih Laitlang ah hman cumi percentage cu kan thleng ban lo. Cun, kei hi thil a ṭha zawngih zoh duhpawl ka si in ka thei ih, hrekkhat pawlin Singapore ah mi hnen-um ih kan ra thlen tikah Pathian hman ngaihsak nawn loin insangpawl thawn tla an um tivek tla kan rak thei ruri ṭheu ih, thilcang thei mi tla a si ko nan a tamsawn cu an si lo. 95% hnakih tam sawn cu khavek an si lo ti fiangten ka hmu ih Pathian kan duhzia ka hmu ih lungawinak tampi ka nei.

VT : Singapore na hmuhtumdan le na hmuh taktak ah danglamnak a um maw? Ziangtin na feeling?
LDA : South East Asia ram pawl ka tlawng hnuaihni ih Pathian zarah, Singapore hi tuiṭum lawng hi remcang ka si. Singapore thawmvang ka theihdan cu “a thianghlim” ti a si. Si, a thianghlim zetin ka hmu pakhatnak ah, asinan South East Asia pawl, Manila, Kuala Lumpur lam ka rak tlawn zo ruangah maw ka thei loih, maw, a hlanih a thianghlim tuk an rak timi a tu cin ah a tluk nawn lo maw a si cu ka thei lo. Ka zum hnakin a thianghlim vurvi tuk lawmmam in cun ka thei lo. Asinan an nunkhawsakdan ka zoh tikah a cangkang , zohṭhim an tlak ti cu ka hmuhdan a si.

VT : Ee, cutin mitu na sal vekin na rak tlawngnak khua a um hnuaihni na tiih khuitawk khua le ram pawl na rak tlawng? Ziang mi thu, Pathian thu in maw ti tla in von sim lawlaw thei pei maw?
LDA : Aw si. Manila cu Bible tlawng kai ding ruangah kan va tlawngah a cangih kumkhat le hrek ka va um. Kuala Lumpur hi ka fanu um ve ruangah kan pafa programme in kumhnih Christmas ka va hmang Manila ihsin. Aneta deuh sawn tla cu Falam ihsin kan nu tla ra tlawng ve dingin kan timtuah ih Pathian zarah tluangten kan nupa in kan va hmang. Kanmai’ sung programme rori si Kuala Lumpur cu. Cun, Bangkok hi cu Kohhran programme in sort scores kan nei ih zarhkhat sung .

VT : Singapore ramih um nuam na tibik mi?
LDA : Singapore hi tam tuk cu ka vak man lo. Tuih Sky Park kan feh ih, cun, Sentosa ah Mawite tein in rak fehpi, ka vak ih a nuam thluh ko. Zoh an tlak, minung hrangah thil an tuah tihi a theihtheih tuk. Abiktakin kannih Kawlram tla cu minung hi an care lo tuk tikah ziangkim minung nunnomnak dingah an tuah ti ka hmuh tikah ṭha ka ti zet.

VT : Cu le har na tinak teh a um maw?
LDA : Aa, thlakhat te sung lawng ka umih har tinak zianghman ka nei lem lo. Ii, asinan mak ka ti zet mi pakhat cu, hmundang hnakin pitar putar hnaṭuan ka hmu tam zet. Cun, mi cakvak lo, kut ke kim lo hnaṭuan an tampi ka hmuh tikah mak ka ti zet.

VT : FCFS hi Pathian lamah ziang tluk in kan ṭhanglian tin na ruat? Hihnak ih kan ṭhanso sinsin thei dingah ziangtin hma la sehla ṭha na ti?
LDA : Si, Falam Christian Fellowship Singapore hi ralkhat ihsi cun ka rak thei ih a hmun ka thlen tikah kan cak zetin ka hmu. A tam sawn cu mi hnen-um kan si tikah kan zalen loih proggrame hmuahhmuah ah kan suak thei lo. Asinan Pastor pakhat in zarhkhat ah sermon vei 5 pek a ṭul hi laitlang zovek pastor hman an pek dahlo mi a si. Curuangah Pathian thulam ah kan ti a hal, Pathian thu kan duh ih Pastorpawl khalin napi ih timtuahnak neih a ṭul. Menmen ih timtuah a theih lo ti ka ruat ih kan fellowship kaihhruaiawkdan hi memberpawl cu sim lo, Pastorpawl hrangah hman napin thlarau lamah thazang laknak a si tiin ka hmu.

VT : Pawlkom lole Fellowship ṭhansonak dingah ziang a thupibik tiin na ruat?
LDA : Pawlkom hi mizan thlacamnak khalah ka sim ih, kannih Falam mi hi Falam tiin kan ti koaw nan mah ṭong, insang ṭong nei cio kan si thluh ih Falam ṭong kan ti le hman a thluk malte te a rak dang thluh hi a rak si. Asinan cumi ahcu zoih ṭong ti um loin Falam ṭong tin kan hmangtlang thluh ih tangdawrnak le lungrualnak hi kan lakah a um tiin ka hmu zet. Ih, cumi cu ṭha ka tiih cumi cu pawlkom in a ṭulbik mi khal a si.

VT : Ziangtik ihsin Pathian hna na ṭuan thok?
LDA : Si, Pathian hna ka ṭuan thoknak hi zung cazi kha kum 4 sung ka rak ṭuanih cumi kum 4 sungah typing a hlanah cun manual type in kan rak nganih cumi in cun Pathian hna ministry ngaingai minister ka hon ṭuan tikah tampi in bawm. Ih, 1989 march thla ihsin Pathian hna ka tuan ih tuini tiang kum 25 sungah ka thleng ve thlang. .

VT : Hmailam can ah ziangti vekin Pathian hna ṭuan vivo na tum?
LDA : Pathian zarah kan kohhran in kum 65 tiang ṭuan thei dingin , cuimi ihsi pinsin pek a si ih tuvek a si cun kum 13 lai hnaṭuannak ding ka nei lai. Pathian in rem a tiih cuzat ka ṭuan thei a siah cun ka lungawi zet ding. Ih, cumi hnu lam cun Pathian hnenah ṭha a ti dan ih in hruai dingah ka hlanih a thupibik ih ka thinlung ih ka ret mi cu kohhran in service kum 65 tiang in siang mi hi Pathian in ṭuan in siang sehla tihi a si. Cule kohhran ṭhek hnuaihni le kohhran tlan ruri hi ka uar lo bik mi a si nan ka duh lo cingin pawl tlan ka tong mi tla um ih tluangten pinsin ka lak tiang kohhran ah hna ka ṭuan thei ding ka dil.

VT : Cule tulai groupsmail lamah tla an buai phah ruri ih Love Song hi Pathian hnaṭuantu pakhat dinhmun in ziangtin na hmu? Sual tiin na ruat maw?
LDA : Aa, love song hi tu ah hi ka ti tuk nawn lo nan ka tleirawl lai ahcun love song hi ka rak sak ve nasa. Ṭingṭang tla ka tum ih, drum tla ka rak uar ve nasa ih, bass tla ka rak tum ve ciamco ṭheu. Love song hi napiin ka rak sak ve. Ii, love song hi sual ka ti lo. Asinan Biakinn ah sak thei a si lo sawn hi cu ziang si pei tihi ruah ding tampi a um. (A hni phah, thusuttu khal a hni…)

VT : Tulai Mino ṭhansonak hrang in dodal biktu ziang a si tin na ruat?
LDA : Si, kannih Laimi cu miphun nauhakte kan va si tikah ṭhansonak ding hi tampi kan neih a ṭul. Curuangah Laimi hrang thupibik kan ruah dingah zirnak lam, Cazir asilole technical lam maw, rawlsuan lam, aa.. house keeping a phunphun zir ding tampi kan nei in ka thei. Cule, teimak suah ih ti ciamco kan ṭul zetin ka thei.

VT : Singapore Falam mi pawl le Vapual Tlangau casiartu pawl hrang thucah na duh mi?
LDA : Aa si, hiti vekih interview in tuah hi ka lungawi. Keimah nun ihsi cun thil zirtlak ding zianghman a um ka zum lem lo. Asinan keimah ih thlun mi Pathian hnen ihsin zir ding tampi kan nei ding ka zum ih, himi ka ṭongkam le ka mizia ihsin Pathian mizia pahnih khat tal a lang ding ka zumih cumi cu a si.

VT : Cule a lo pehtlaih duhtu hrangah, na tlung hnu ah tla ziangtinkim ah thu lo sut duh tivek hrang ziangtin kan lo pehtlai ding?
LDA : Email hi pahnih ka nei ih ka hman tlangpi sawn cu lalduhawma62@gmail.com hi pehtlai theinak cu a si.

VT : Na can sunglawi pekin kan thusuhnak in let ruangah kan lungawi.
LDA : Aa, kei tla lungawinak tampi ka nei.

Leave a Reply

Your email address will not be published. Required fields are marked *